Bizkaidendaken Merkataritzaren Gala ospatu zuten atzo Durangon, bere XV. urteurrenean. Durangoko eta Bizkaiko Erakusleihoen Lehiaketetako sarien banaketa egin zuten. Gainera, Etorkizun eta Berrikuntza eta Ibilbide Profesionalari Bizkaidendak sariak ere izan ziren ekitaldiaren ardatz. Azken zatian duela hamabost urte Bizkaidendak sortu zutenei omenaldi zentzuduna egiteko. Eusko Jaurlaritzako eta Bizkaiko Foru Aldundiko ordezkariak eta Bizkaiko hogeita hamar alkate eta zinegotzi baino gehiago izan ziren ekitaldian.
José Andrés Cebrecos Goikoetxeak, "kaleko merkataritzaren, hurbileko merkataritzaren, Bizkaiko auzo eta herrietako merkataritzaren eta gure kaleei argia eta zerbitzuak ematen dizkieten establezimenduen garrantzia" azpimarratu zuen.
Durangoko erakusleihoen lehiaketako sariak ere banatu zituzten. Durangoko Udalak eta Durangaldeko Dendak Bai merkataritza eta ostalaritza elkarteak antolatutako Gabonetako erakusleihoen lehiaketa Dossis Designs dendak irabazi du. Gabonetako kanpainari begira, Durangoko establezimenduetan kontsumoa sustatzea du helburu ekimenak. Ekitaldian Mireia Elkoroiribe alkateak nabarmendu zuenez, "negozio horietako bakoitza ez da soilik kalitatezko produktu eta zerbitzuak erosteko tokia, arreta bero eta pertsonalarekin, elkarguneak, solasaldiak eta harremanak eraikitzeko guneak ere badira. Gure komunitatearen arima". Maialen Illescas irabazleak 1.500 euro eta diploma jaso zituen. Bigarren saria, 1.000 eurokoa, Floristeria Bekoa establezimenduari egokitu zitzaion, hirugarrena, 500 eurokoa, Gozatu gozotegiari. Lehiaketara Durangoko 38 establezimendu aurkeztu dira guztira.
367 pertsona lehen herri-bozketan
Epaimahaiak emandako hiru sari irabazleez gain, aurten lehen aldiz laugarren sari bat izan da, herri-bozketa bidez aukeratua. Herritarrek Gabonetako erakusleiho gogokoenaren alde bozkatzeko aukera izan dute, eta Mi Casa establezimendua irabazle suertatu da kategoria honetan. Saria Rakelen eskutik jaso zuen, TYL iazko establezimendu irabazlearen jabea. Bozketan 367 lagunek hartu dute parte eta saria 300 eurokoa izan da. Gainera, beste berrikuntzetako bat merkataritza eta ostalaritza-establezimenduen artean banatu den izar bereizgarria izan da, partaideak erraz identifikatu ahal izateko."Jende asko animatu da herri bozketan parte hartzera eta edizio bakoitzean gehiago izatea espero dugu. Bestalde, oraindik erakusleiho irabazleak bisitatzeko egunak daudela gogorarazi nahi dut", gaineratu zuen Jesica Ruizek.
Ondoren, Bizkaiko V. Erakusleiho Lehiaketako finalistei diplomak banatu zizkieten. Erakusleihoen lehiaketako boto herrikoia banatu zuten, eta Trapagarango Maxi'm Peluqueros establezimenduari eman zioten saria. Bizkaiko erakusleihoen lehiaketako hirugarren saria Astrabudua-Erandioko Pollería Charo-k jaso zuen. Bigarren saria Abadiñoko Enxebre Ogidenda okindegiak jaso zuen. Bizkaiko erakusleihoen lehiaketaren bosgarren deialdiko irabazlea Zornotzako Lima establezimendua izan zen.
Ondoren, Bizkaidendakek bi sari berri banatu zituen: Etorkizuna eta Berrikuntza, Urdulizko Bioestética Hiart Intxaurtieta establezimenduari egokitu zitzaion. Eta Ibilbide Profesionalaren saria Bermeoko Itxasne Gabilondo farmaziak jaso du. Familiak 202 urte baino gehiago daramatza farmazia horretan, toki berean.
Amaitzeko, omenaldi hunkigarria egin zaie Bizkaidendak sortu zuten zortzi elkarteei, XV. urteurrenean. Hala, gaur egun Bizkaidendakera bazkidetuta dauden 43 zonalde eta gremio elkarteen familia argazki batekin amaitu da. Galan Durangoko L 'Atelier eskolako dantzariek bi dantza emanaldi eskaini zituzten.