Bitartean, Bizkaiko Garraio Partzuergoko arduradunekin gai horren inguruan izan duten batzarraren berri eman dute Zaldibarko eta Berrizko alkateek, prentsa ohar baten bidez. Iaz egin zuten bezala, zonalde eta tarifa aldaketa horregaz Zaldibar eta Berrizko erabiltzaileak "asko kaltetzen" direla adierazi diote Partzuergoari, izan ere, herritar gehienek gehien erabiltzan duten zerbitzua, Durangorako norazkoa, garestitzen baitzaie.
Berriz eta Zaldibarko alkateek idatzi horretan azaltzen dutenez, "zonifikazioak alabeharrez aldaketa batzuk ekarri behar zituela" erantzun diete Bizkaiko Garraio Partzuergoko arduradunek, eta udalerri bien kasuan, aldaketa horrek "onuradunak eta kaltetuak" izango dituela.
Herritarrei "berriro ere elkartzeko" deia egin diete Berriz eta Zaldibarko alkateek, eta "herritarren defentsan arituko direla" berretsi dute. Aurreratu dutenez, astelehenean, gaiaren jarraipena egiteko udalbatzarrak egingo dituzte herri bietan.
