Berrizko eta Zaldibarko alkateekin izandako batzarrean partzuergoak zonalde banaketa orokorraren inguruko azterketa egingo duela aurreratu du. Hala ere, urte eta erdi inguru beharko dute ikerketa egiteko. Baigorrik dioenez, "denbora larregi" da tarifa hauek aldatu barik uzteko. Alkate biek Euskotrenekin batzartu gura dute orain. Partzuergoak azterketa egin artean aurreko tarifa sistema aplikatzeko eskatuko diote Euskotreni.
Berrizko eta Zaldibarko Udalek tarifikazio sistema berriaren inguruko kexa idatziz helarazi diote Euskotreni eta erantzuna jaso dute. Baigorriren berbatan, Euskotrenek dio CTBren zonaldekako sistemara egokitu direla, eta zonaldeak aldatzea partzuegoari dagokiola. "CTB eta Euskotren ardura bata bestearen gain uzten ari dira".
Durangoko mozioa aurrera
Atzo Durangoko Udalak tren zerbitzuaren tarifikazio berriaren inguruko mozioa onartu zuen. EH Bilduren proposamena EAJk, Herriaren Eskubidea alderdiak eta PSE-EEk babestu zuten. PPk aurkako bozka eman zuen. Idatzi horretan, Durangoko Udaleko osoko bilkurak Euskotreni eskatzen dio tarifikazio sistemaren errebisioa egin dezala Berriz, Zaldibar, Durango eta Abadiño (Traña) tarifikazio zonalde berean berriro elkartzeko. Beraz Durangoko Udalak Garraio Partzuergoari eskatzen dio Durangaldeko eskualdeko herriak tarifikazio zonalde berean elkartzea.