Ana Oregi sailburua Garraioaren Euskal Behatokiko presidentea ere bada, eta EH Bildukoek uste dute koordinazio mahai horrek baduela zer esana: “Probintzien arteko arazo bategatik, herri batzuetan zerbitzu duinik barik gaude”, adierazi zuen Endika Jaiok. Arabako Foru Aldundiak esleitu du Durango-Gasteiz linearen kontratu berria, baina erabiltzaile gehienak bizkaitarrak dira; Durangaldekoak, hain zuzen ere.
Nekane Rozas erabiltzaile durangarrak berba hartu zuen, zelako egoera bizi duten azaltzeko. “Berdin digu eskumena norena den, ez gara alderdikerietan sartuko. Arazoa konpontzea gura dugu”.
Espainiaren eskumena
Linea berria Gasteiztik pasatu, eta Mirandaraino doa (Burgos). Horregatik, Oregik adierazi zuen Espainiako garraio arloak daukala orain eskumena. Hala ere, Garraioaren Euskal Behatokian gaia aztertzeko konpromisoa hartu zuen. “Adi egongo gara”, esan zuen Jaiok.