Alemaniako 1920ko hamarkadako Bauhaus eskolaren eta Marokon ehungintzan lan egiten duten emakumeen inguruko lana sortu gura du Martinezek. Euren eskulanak merkaturatzeko kooperatiba txikietan elkartzen ari diren Marokoko Atlas inguruko emakume alfonbragileen istorioa hartuko du lana abiatzeko oinarri: “Bi sasoitan antzeko materialagaz eta sentsibilitateagaz diharduten errealitate bi erakustea da daukadan asmoa”, kontatu du artistak. Besteak beste, generoaren gaia landuko du izaera sozialeko proiektu artistikoan. Ideiaren emaitza, eta hartuko duen forma zein izango den zehaztu barik dauka Martinezek oraindik, baina badabil adierazpide garaikide aproposaren bila.
Bilbao Arteren beka
Austrian proiektu artistiko bat lantzeko Bilbao Artek ematen duen beka ere jaso berri du Karlos B. Martinezek. Herrialde horretan beste proiektu bat gauzatuko du irailean eta urrian. “Eskultura ere izango den film bat” egin nahi du, “denboragaz eta espazioagaz jolastuta”. Pozik joango da Austriara, zinema esperimentalaren eta arte garaikidearen gune inportanteetako bat delako.