Berrizko udaleko aurrekontuak prestatzeko parte-hartze batzarrak egingo dituztela azaldu dute programan, eta HAPO Herri Antolaketarako Plan Orokorra berrikusteko ordua ere izango dela azaldu dute. Bestelako proposamenen artean, Herri Hezkuntza Proiektua eratzea dago; eragileekin batu eta hezkuntza arloko diagnostikoa egiteko. Gazteekin ere Gazte Mahaia sortzea proposatu dute, gazteen kezka eta iritziak aintzat hartzeko. Auzotarrekin harremanak lantzeko, bilera bereziak deitzeko asmoa dute, eta, batzar horietarako, auzo bakoitzak bere ordezkaria aukeratzea proposatu dute.
Bestalde, ongizate arloan, menpekotasun egoeran dauden herritarrak artatu ahal izateko Eguneko zentroa zabaltzeko aukera aztertuko dutela azaldu dute. Ingurumenari eta tokiko garapenari dagokionez, gogoratu dute 2017rako udalak herriko zaborren kudeaketa zelan egin erabaki behar duela, eta hori prozesu parte-hartzaileagaz egin nahi dute. Herriko ekoizle eta saltzaileen lana bultzatzeko, Berrizko nekazarien produktuak Berrizko dendetan erosi ahal izateko beharra egingo dutela ere azaldu dute.