Europako Batasunak bi milioi euro inbertitu ditu proiektu honetan, eta Gipuzkoako Vicomtech-IK4 enpresa da koordinatzailea. Pilota modalitateez gainera, adibidez, hurling edo futbol gaelikoa ere badago proiektuaren barruan. Urriaren 6an eta 7an izan ziren Oxforden euskal pilotariak.
Gorputz osoan sentsoreak jarri zizkieten, mugimenduak harrapatzeko. Pilotako mugimendu guztiak –sakea, dejada eta gantxoa, esaterako– behin eta berriro errepikatu zituzten emaitzagaz gustura geratu arte. Ondoren, puntako teknologiaren bidez, hiru dimentsioko irudi grafikoak egingo dituzte, eta kirol elkarteentzat eskuragarri egongo dira. Gainera, kostu baxuagoko sistema eta sofware ireki bat garatzen ari da Vicomtech-IK4, kirol elkarteek erabili dezaten. Horrela, pilotarien mugimenduak grabatu eta alderatu egin ahalko dira, jarrerak hobetzeko.
