Atzoko ekaitzaren erdian izan zen Sallobente auzoko ezbeharra. Teilatutik etxe barrura sartu zen tximista, eta barrukaldea ere nahiko kaltetuta geratu da. Zorionez, eskaratzean zegoen Emilia Agirrebeitia, eta oinaztuak ez zion kalterik egin: "Ahal izan nuen moduan irten behar, ez nuen ezer ikusten eta, dena hautsa eta eskonbroa zen". Susto handia hartu zuen, baina zorionez kolperik ez: "Disgustua bera nahiko kolpe da". Bakarrik bizi izan da Agirrebeitia etxean, eta orain, bere familiarekin dago.
Atzo iluntzean eta gaur goizean ere, Sallobente auzora gerturatu da Berrizko alkate Orland Isoird. Berak azaldu duenez, eguraldia hobetzerakoan ikusiko da konponketa lanak zelan egin: "Egitura bera ondo dagoela ematen du, baina kalteak handiak dira". Tximistaren kolpetik Emilia ondo atera izana nabarmendu du: "Inportanteena etxeko jabea salbu dagoela da".