Duela astebete Gernikan egin bezala, orain, Zornotzaren txanda izango da. Foru Aldundiko Ekintza sozialeko iturriek ANBOTOri jakinarazi diotenez, Eubako frontoian ipiniko dute dispositiboa. Durangaldeko eta Arratiako egoitzetako beharginak deitu dituzte PCR proba egitera. "Dispositibo berezia da, modu prebentiboan egingo dira PCR probak. Ez du esan gura positiboak daudenik, baina halakorik balego, modu honetan detektatuko genituzke", azaldu dute Foru Aldundiko iturriek.
Dispositiboa 8:30etatik aurrera egongo da martxan. Bai Durangaldeko eta bai Arratiako egoitzetako beharginek, bertaratzeko hitzordua ipinita dute dagoeneko. Aurreikuspenen arabera astelehenean hasi eta astelehenean bertan bukatuko dituzte PCR probak.