Neguan ere talde horregaz elkarlanean ibili zirela azaldu du Sergio Fernández Zornotzako Korrikalariak klubeko presidenteak: “Neguan janari asko biltzen dutela, baina udan joera hori jaitsi egiten dela esan ziguten, eta, horregatik, gure lasterketaren bidez laguntzea pentsatu genuen”.
Izen-ematea doakoa da, eta aurrez egiteko epea uztailaren 23an amaituko da: zornotzakokorrikalariak@gmail.com. Baina egunean bertan ere eman daiteke izena. Lasterketen egunean janaria batzeko postu bat jarriko dute izena emateko gunearen ondoan.
Hasiera eta helmuga puntua udaletxe pareko plazan egongo da, eta partaideak adinaren arabera banatuko dituzte; lasterketa laburrak direnez, ibilbidea San Migel kaleko biribilguneen artera mugatu dute.
Probako lehen parte-hartzaileak kuadrillen arteko challengean parte hartzen dutenak izango dira, 18:30ean. Ondoren, 19:00etatik 20:00etara, hamar minuturo, mailaz maila irtengo dira. 19:40an hasiko den proba, ostera, berezia izango da: Ekin Amorebietaren bidez, Urduñako ikastetxean uda igarotzen dabiltzan 12-14 urte arteko 27 sahararrek parte hartuko dute. Gizarteratzen laguntzeko helburuz antolatu dute lasterketa eta herritarrei eurekin korrika egiteko deia egin dute antolatzaileek.