Astepe auzoko —batez ere 18-25 zenbakien artean— hainbat gabezia jasotzen ditu arkitekto talde batek udalarentzako egindako azterketak. Batetik, espazio publikoen “gabezia” azpimarratzen du. Bestetik, autoak aparkatzeko plazen “eskasia” dagoela dio; ondorioz autoak araututa ez dauden tokietan aparkatzen dira, espaloietan esaterako. Astepeko eraikuntza batzuei iaz egindako azterketek azaleratu zituzten “patologia garrantzitsuak” ere gogoratzen ditu txostenak.
Beraz, komenigarri ikusten dute espazio publikoak eta gune berdeak zabaldu eta saneatzea, aparkaleku guneak berrantolatzea eta inguru hartarako irisgarritasuna hobetzea.
Horretarako, txostenak hainbat alternatiba proposatzen ditu, baina bat besteen gainetik nabarmentzen du: arau subsidiarioetan aldaketa puntual bat egin eta inguru hartako lurrak (1.230 metro karratu) udalak lortzea; horrek udalari hobekuntza lanak egiteko eskumena emango lioke.