Oraindik ez dakite Zornotzan zer ondorio izango duen akordioak. Zazpi kaleratze Zornotzako lantegirako daude aurreikusita, eta beste hiru Zornotzako lantegiak Logroñon (Espainia) eta Iruñean dituen ordezkaritzetarako. Aste honetan borondatezko kaleratzeak jakinarazteko epea ireki dute. Datorren astean jakingo dute zehazki zenbat kaleratze eta jubilazio egongo diren Zornotzan.
Barikuan egin zituzten bozketak, enpresak Espainia osoan dituen lantegietan, eta gehiengoak akordioa onartzearen alde bozkatu zuen. Ondorioz, astelehenean greba egin eta langile guztiak enpresaren Madrilgo eraikin zentralean batzeko asmoa bertan behera geratu zen. Estatuan hiru lantegik bakarrik eman zuten ezezko botoa, eta tartean Zornotzakoa dago (38 ezezko eta 20 baiezko); Malagakoa eta Coruñakoa dira beste biak. Erabakiagaz ez daudela ados, baina “gehiengoak dioena onartu” behar dutela adierazi du CCOOko Unai Marzanak.