Ogenbarrenako espazio publikoa berrantolatu eta lur azpiko azpiegiturak berriztatzeko lanak hasi zituzten astelehenean 300.000 euroko inbertsioagaz. Lanak fase bitan egingo dituzte bizilagunei ahalik kalterik gutxien eragiteko.
Lehenengoak, batez ere, Arrieta Jaio eta Unamuno kaleei eragiten die eta urtea amaitu aurretik lanik gehienak amaituta egotea itxaroten dute David Latxaga alkatearen esanetan. Espazioaren berrantolamendu berria egituratzeko orduan, oinezkoen erosotasuna hartu dute oinarri moduan. Espaloiak zabaldu egingo dituzte eta, horren ondorioz, autoen aparkalekuak berrantolatu egingo dira. Esaterako, Arrieta Jaion (Aramotz kalerantz begiratuz) ezkerraldeko aparkalekuak kendu egingo dituzte eta eskumakoak beregituratu. Lehen fasearen sei aparkalkeu galduko dituzte, baina bigarrenaren ostean ia denak berreskuratuko dira.
Lan horiekin batera, eraikinei josita dauden kale argi denak kendu eta berriak ipiniko dituzte, baina lurrean. Beste aldaketa bat zaborrei dagokie: Landeta paretik kendu eta Gudarien kalean aurrerago eramango dituzte. Erabaki hori hartu dute zaborrak parke ondotik aldentzeko. Era berean, Arrieta Jaion daudenak ere kendu egingo dituzte, zaborrak gune bakar batean eta kanpoaldean kontzentratuz.Horrela, "zaborrak batzeko kamioiak ez dute auzo barrura sartu beharrik izango, zaratak gutxituz".
Ur hodieriak bananduta
Azpiegiturei dagokionez, bizilagunak sarritan kexatu diren usain txarra dela-eta, orain arte hoditeria bakarrean zihoazen euri urak eta fekalak banandu egingo dituzte; hodi banatan joango dira.
Lehen faseko lanak amaitzean hasiko dituzte bigarren fasekoak. Laster datorren urteko aurrekontuak onartzea itxaroten du alkateak eta aurrekontuetan lan horietarako diru atala bideratuko dute.