Zornotza Saskibaloi Taldeak eta Arturo Cruz joko antolatzaileak (Salamanca, 1993) akordioa lotu dute eta datorren denboraldian Zornotzan jarraituko du. Cruz aurtengo urtarrilean heldu zen taldera EBA mailako Tormes taldetik. Buruz buruko jokaldietan zein pick&roll jokaldian oso abila da klubeko ordezkarien esanetan eta, gaztea den heinean, oraindik eratzen dagoen jokalaria dela uste dute.
Iaz liga erregularrean 14 partidu jokatu zituen eta 9,5 puntu sartu zituen batez beste; baita 2,4 errebote eta 2,5 asistentzia ere. Horrela, bere batez besteko balorazioa 8,8koa izan zen. Play off-etako hiru partidu ere jokatu zituen eta 9 puntu sartu zituen batez beste.
