EH Bilduk idatzi horretan dioenez, "euskal preso eta iheslariak etxean ez dauden bitartean, berauen herriratzearen aldeko banderolak Zaldibarko balkoi eta leihoetan jarraituko dute". Azpimarratu dute, "Espainiako Gobernuak giza eskubideak betetakoan desagertuko" direla banderolak balkoietatik.
Herritar talde batek proposaturiko mozioa onartu ondoren ipini zuten Euskal preso eta iheslariak etxera dioen kartela udaletxeko balkoian, 2011n. Baina udalaren erabakiaren kontra helegitea aurkeztu zuen Carlos Urkijo Espainiako Gobernuaren EAEko ordezkariak, eta epaitegietan ibilbide luzea egin ostean, banderola kentzeko agindua eman du maiatzean, administrazioarekiko auzibideen Bilboko epaitegiak.