Urriaren 9an, barikuan, 250 bat ardi igaroko dira Otxandioko herrigunetik. Ikusi nahi dituenak goiz esnatu beharko du. Oleta inguruko landa batean emango dute gaua eta, goizean goiz, 07:00 inguruan, Otxandio herrigunea zeharkatu, eta Dimako aireportu zaharrerantz joango dira, Getxoko Udaletik adierazi dutenez.
Fredi Paia bertsolariak eta Aitor Gisasola errealizatzaileak proposatutako ideia batean du sorburua dokumentalak. Sasoi bateko transhumantzia bideen nortasuna berreskuratu gura dute. Hainbat ibilbide zeuden, eta horietako bat Gorbean hasi, eta kostaldean amaitzen zen, tartean Otxandiotik igarota. Ibilbide hori lau egunean egingo dute eta, besteak beste, Larrabetzu, Gamiz eta Uribe Kostako hainbat herrigune bisitatuko dituzte. Tarte batzuk kamioiz egin beharko dituzte, baina, oro har, oinez ibiliko dira.