XIX. mendera arte Erdi Aroko hiribilduetako etxeen ezagugarri batek iraun zuen Otxandion: bizitza eta lanbidea leku berean garatu izana. Behealdean eskulangileen tailerrak kokatzen ziren, batez ere errementarienak, eta goiko solairuetan etxebizitzak zeuden. Horrela, XIX. mendeko etxebizitza bateko sukalde bat ikusi daiteke erakusketan. Berori osatzeko altzari eta beharrezko osagai asko Urkiolako santutegiko abadetxetik jaso dituzte; norbanako batzuek ere hainbat tresna utzi dizkiete.
Askotariko tresneria
Erakusketa osatzeko ahalik eta tresneria gehien batzen saiatu dira XIX. mendeko ezkaratz bat ahalik eta ondoen islatzeko. Horrela, besteak beste, ohiko mahaiez eta aulkiez gainera, argi ontzia, txokolate ontzia, lisaburdina, ogi-moldea, lapikoak, sehaska, gorua, karburua, arropak eta beste hainbat tresnea eta osagai ikusi daitezke erakusketan. Beheko su bat ere irudikatu dute.