Gaztetxearen bueltan dabilen gazte kopurua jaitsi egin da azken urteetan, gazte asanbladako kideek adierazi dutenez, eta, horretaz gainera, beharrezko ikusten dute gaztetxeari norabide zehatz bat ezarriko dion hausnarketa bideratzea. Horiek horrela, herriko hainbat gazte kuadrillarekin batzartu dira, eta prozesu horren ondorio da zapatuko jardunaldia.
Ezagutza eta konfiantza jolasekin hasiko dute eguna, zapatuan batuko diren gazteak elkar ezagutzen hasteko. Eta, ondoren, lanari ekingo diote. Goizean, gaztetxeak orain arte egindako bidea zein izan den azalduko dute, eta gazte asanblada eta gaztetxea kontzeptuak esanahiz janzten saiatuko dira.
Eguerdiko luntxaren ostean, 13:30 inguruan hasiko dute batzarrik inportanteena bertaratzen direnek: Otxandioko gazte asanbladaren eta gaztetxearen etorkizuna definitzeko batzarra, hain zuzen.