%2009.46.43.png)
Eskuak margotuta eta gelditzeko keinua eginez egin dute elkarretaratzea. Kontseiluak deituta, euskararen aldeko neurrien kontrako "ofentsiba" eteteko eskatu gura izan dute Otxandion, eta Euskal Herriko beste hamaika herritan: "Hizkuntza-komunitateak eskubidea du bere hizkuntza normalizatzeko politika definitzeko eta garatzeko inolako kanpo esku-hartzerik gabe", azaldu dute elkarretaratzean irakurritako testuagaz.
Durangaldean, Otxandio, Zaldibar, Mallabia, Mañaria eta Izurtzako udalek jaso dituzte Urkijoren errekerimenduak. Estatu espainiarreko ordezkariak, guztira 61 udalei bidali die hizkuntza-irizpideekin lotutako edozein erabaki jakinaratzeko agindua, eta hainbat udali indarrean dauzkaten euskara planak bidaltzeko eskatu diete. Gipuzkoako Foru Aldundiari salaketa ipini dio baita, kontratazioetan hizkuntza-irizpideak jartzeagatik.
Kontzentrazioko testuan azaldu dutenez, "udalek euskararen normalizazioan aurrera egiteko hartu dituzten neurriak herritarron eskubideak bermatzeko urratsak dira". Euskalgintzaren izenean, hizkuntza-politika eraginkorrak ezartzeko pausuak ematen dituztenei babesa emango dietela azaldu dute.