Jaiok adierazi duenez, udalean jakitun dira kamioien joan-etorriak inguruetan sortuko duen “enbarazuaz”. Hori dela-eta, auzotarrekin batzarra egin dute dagoeneko, egoeraz informatzeko.
“Zikloa itxi”
Edozelan ere, lan hori egin beharrekoa dela esan du Jaiok, eta baikorra izan da balorazioa egiterakoan: “Nahiz eta denbora batez enbarazu egin, lanei esker harrobiaren zikloa itxi egingo da”. Eusko Jaurlaritzak 2010ean agindu zuen harrobia ixtea; aurretik, auzitegiek atzera bota zuten enpresaren ustiapen berrirako eskaera, eta Urkiolako Parke Naturaleko patronatuak ere harrobien hedapena mugatu zuen.
Jaurlaritzak harrobia berreskuratzeko agindua eman zion enpresari, eta instalazioak kendu zituzten. Orain, betetzen hasteko hasierako obra batzuk garatzen dabiltza, eta laster hasiko dira lurra ekartzen.
Errepideak erabiltzearen eta obra baimenaren tasengatik, 300.000 euro inguru ordainduko dizkio enpresak udalari.