Maitasuna (ez) da

Erabiltzailearen aurpegia Libe Mimenza Castillo 2016ko ots. 12a, 08:30

Historia idazleek diotenez, Lupercusen erritoetan dauka jatorria San Balendin egunak. Erroman, otsailean, ugalkortasunaren festa paganoa ospatzen zen. Bertan, besteak beste, loteria bat egiten zuten emakumeak zozkatzeko. Gizonek emakumeen izenak kutxa batean sartzen zituzten lehenbizi, gero, bat aukeratu, eta huraxe bilakatzen zen beraien urte osorako gozamenerako andregai. V. mendean debekatu zuen kristautasunak tradizio hura, eta orduan izendatu zuten otsailaren 14a maiteminduen egun; data horretan hil zutelako Balendin izeneko apezpiku bat, hain zuzen, gudu-zelaian errendimendu hobea izan zezaten soldaduek ezkontzea debekatuta zuten garaian, hala nahi zuenak ezkontzeko hautua egin zuelako.

Baina, maitasuna ez du agiri baten giltzarrapoak eusten. Ez da, egunotan eskaintzaz josi gaituzten arren, 2x1 pack merketan saltzen. Ez da erosten. Ez da eskatzen. Maitasuna ez da ondasun bat; ez da zure bildumarako beste jabetza bat.

Are gehiago, ez dugu maiteminez minduta bizi nahi. Esnatzea nahi dugu. Dutxako ura aurpegian sentitzea. Kafea usaintzea. Begiradekin hitz egitea. Barrez lehertzea. Ordu txikitara arte eztabaidak luzatzea. Otordu baten bueltan biltzea. Liburu bat irakurtzea. Idaztea. Dantza egitea. Irribarre baten melodian zu aurkitzea. Agur batek eragiten duen zirraraz harritzea. Lotsaren mugak leherrarazten dituen eztandan larrua jotzea... Baina, oroz gain, aske bizitzea.

Horixe da maitasuna, pertsona beste forma dituen poliedro librea.

ANBOTOKIDE izatea gure komunitatearen parte izatea da, euskararen erabilera sustatzea eta herrigintzaren aktibazioan pausoak ematea.


EGIN ZAITEZ KIDE!