Oinatz Bengoetxeak, beste behin, Untoria izango du kide atzeko koadroetan, eta Andonik behatzak gurutzatuta jarraituko du lehia. Zapatuan jakingo dugu bizkaitar batek edo bik jarraituko duten binakako txapelerantzako bidaia, oraindik luzea, finalerdiak ere ligaxkan jokatuko baitira.
Txapelketa oso luzea, luzeegia gertatzen ari da. Pilotarien hutsegiteak asko izan dira, eta ez da kasualitatea jada finalerdietan diren bikoteak osoenak izatea. Ezkurdia-Zabaleta eta Artola-Albisu bikoteek bere horretan jokatu dituzte partidu guztiak. Pablok partidu bakarra utzi du jokatzeke, baina beste bikote guztietan dantza ikaragarria izan da. Eta azken bikotea zein ote? Bengoetxea-Untoria (Aretxabaleta) / Irujo (Altuna)-Barriola.
Nahiko genuke bigarren bizkaitarra finalerdietan izatea, baina ez da samurra izango. Baina hori horrela suertatuko balitz, ligaxka oso berezia eta ezberdina izango litzateke; nork pentsatuko zukeen orain pare bat hilabete finalerdietako ligaxkan azken hamarkadako bi izarren falta izango zenik? Txapelen bidean Aimar eta Irujo falta!