Iurretak sei kofradia dituena gauza jakina da. Euretako bat dokumentazioan, gehienetan, azken mendean, Cofradía de San Fausto izenez agertzen bada ere, XVIII. mendeko Iturrizaren eskuizkribu batean Faustecoa agertzen da, eta, entzuna diet bakixar batzuei Fauste esaten San Fausto eta San Sebastián ermiten inguruari.
Elorrioko sarreran dagoena ere San Fauste de Ybarra izenez agertzen da 1514an, eta gero ehunka aldiz, eta inguruan zegoen baso bati Sanfausteburu deitzen zioten. Berrizen, Eitua kofradiako ermita gaur San Fausto izenarekin ezagutzen bada ere, lehenagoko zaharren bati Fauste entzuna diot.
Horrekin guztiarekin esan nahi dudana da erdararen eraginagatik eta euskararen ofizialtasun ezagatik San Fausto esaten bada ere, hagiotoponimiatik, hots, santu izenetik sortutako leku-izen jatorra Fauste dela. Eta, gainera, ez duela zertan san aurretik eraman, guretzat, Salbadore den bezala Gerediagako ermita, eta ez San Salvador. Besterik da San Fausto jaiak datozela orain, baina, auzoaren izen euskaldun jatorra Fauste da.