Alderdiak, eguneroko kudeaketan murgilduta daudela, eta, maiz, tankera honetako ekimenak sustatzen dituztenean, kontraesanetan erortzen direla. Nik adostasun ezkorra adierazi nion. Bi herrialdeak egoera desberdinean gaudela, eta hango tradizio politikoa ere diferentea dela. Nolabait esateko, hango alderdiak profesionalagoak dira. Horretaz gain, mugimendu sozialetatik bereizten dituen marra, hemen baino nabarmen lodiagoa dela.
Durangon zer edo zertan ari garen ere galdetu zidan. Herri erdian bizi banaiz ere, herriko bizitza soziala periferiatik jarraitzen dudala adierazi nion. Hala ere, deiren bat izango nuela.
Jaso dut deia. Ekimena apirilaren 30ean aurkezten dela eta hara joateko gonbita egin didate. Baietz erantzun dut. Une batez, baiezkoak azkarregi ematen ditugula pentsatu dut, ekimen edo ekitaldi konkretu batek zertarako balio lezakeen sakon aztertu gabe. Baina, ongi pentsatuz gero, uste dut hori dela gure indarrik handiena, termino ekonomikoetan balio erantsia esaten dena: euskal kultura eta nortasunaren alde egiten den borondate hutsezko lana, ematen diren ondo pentsatu gabeko baiezkoak.