Arratsaldea pasata, gaztaina erreak janda itzultzen ginen etxera. Eskuineko eskua aitari helduta eta ezkerrekoan, Durangoko Azokan eskuratutako altxor txikiak; bibotedun idazleen sinadurak, kolore eta tamaina ezberdinetako egutegi eta posterrak, argitaletxeetako aldizkariak eta udazken hartako nire nobedadea.
Euria barra-barra egin du azoka egunetan nik 6 urte nituenetik, eta aurtengoa 50.DA!
Helduen begiradapean txiki sentituta, azokan gure lekua aurkitu ez genuenok, zorionekoak gara! Haurrak eta helduak, txikiak eta handiak elkarrekin eta maila berean parte hartuko dugun gunea irudimenez bustiko da beste urtebetez. Transmisioa helburu duen maitasunezko aterpea, kolorez eta jolasez apaindua, irriz eta mimoz berotua. Helduok konturatu gaitezen kultura, sorkuntza eta hizkuntza ez direla zuri-beltzean idatzitakoa bakarrik, ume txiki eta herri txikiek, idazle ezpain gorriek eta haur eta gazte literaturak ere altxatu dituztela beren koloretako esku libreak. Bihar gaur izan dadin.
Etorkizuna orainaldian eraikitzen delako, Saguganbara DA!