2015eko aurrekontua 5.708.000 eurokoa da, iaz baino, ia 500.00 euro gehiagokoa. Inbertsioen atalean, premiazkoak diren proiektuak zituela udalak aurreratu du Iñaki Totorikaguena alkateak. Izan ere, udan egin gura zituzten ikastetxeko leihoak aldatzeko (50.000 euro) mailegu gehigarria eskatua zuen udalak. Era berean, pilotalekuko aldagelak atontzeko beste 50.000 euro bideratu gura dituzte. Aurrekontuekin batera diru-laguntza berri bi onartu dituzte, Hamadako Izarrak eta Amatxorbe elkarteenak, hain zuzen.
"Lehentasunezko proiektua"
Totorikaguena alkateak Santa Apolonia eta Orozketaren arteko lotunea eraikitzea "lehentasunezko proiektua" dela azpimarratu du. Momentu honetan Santa Apoloniarako sarbidea Durangotik bakarrik egin daiteke. Trena lurperatzen den lekuan konexioa egitea da udalaren asmoa. Horretarako 130.000 euroko diru atala aurreikusi du udalak.
Aurrekontuak jasotzen duen beste inbertsioetako bat Goiuria auzorako ur hornidura proiektua da. Totorikaren ustez, "baliteke aurten denborarik ez ematea proiektua martxan jartzeko".
Lanpostuen balorazioa
PSE-EEk eta EH Bilduk aurreko legegintzaldi amaieran gogor kritikatu zuten lanaldien balorazio berria. Apirilaren 27ko udalbatzarrean arrazoi horregatik ez ziren aurrekontuak eztabaidatu ere egin gai ordenean egon arren, EAJk ez baitzuen gehiengorik. Oraingo honetan, lanaldien balorazioa onartu barik aurrera irten dira aurrekontuak, maiatzaren 24ko hauteskundeez geroztik jeltzaleek gehiengoa baitute Iurretako Udalean.