Garai batean hiru errota egon ziren Oromiñon: goikoa, behekoa eta erdikoa. Dokumentuetan ageri denez, Erdiko errota 1.600. urte inguruan martxan zegoen dagoeneko. Duela hamar-hamabi urtera arte kanporako egiten zutela lan azaldu du Mertxe Ibarra etxearen jabeak. Batez ere, artoa ehotzen zuten, “eta garia ere bai, gari sasoian”. Errota martxan ipintzeko moduan dago gaur egun ere, eta etxerako irina egiten dute.
Bisita gidatuan, errota bisitatzeagaz batera, euskal kulturan etxeak izan duen garrantziaz berba egingo dute. Etxea da, izan ere, aurtengo Europako Ondarearen Jardunaldietan landuko duten gaia.