Telesaioa ikusteaz gainera, grabazioaren kontakizuna egingo du Lazaro Milikuak. Aste pare bat eman zituzten kamerariek grabaketetan, kamerentzako errei eta guzti. Antza denez, euretako bat durangarra zen, eta horregatik heldu ziren Momoitioganera. Sei ziren familian, gurasoak eta lau alaba-seme. “Aita natural egon zen aktore lanetan”, esan du Milikuak. Kameren aurrean gaztelaniaz berba egitea kosta egin zitzaiela azaldu du, eta grabazioan parte hartzeko dudak eduki arren, aurrera egin zutela: “Espainia osoan gure bizimodua erakusteko aukera bat izan zen”.
Garaiko udaletxeko idazkaria da Milikua, eta orduan ere bazen; dagoeneko 40 urte bete ditu ardura horretan. Akorduan du udaletxean irudi batzuk hartu zituztela, eta elurra ere egin zuela egunen batean. Gastronomia ere ez zen falta izan: “Txarriboda egin genuen”, esan du Milikuak.