Nizeto Urkizuko hainbat auzokide nekatuta daude jaietan txosnek eta barrakek eragiten duten zaratagaz, eta aurten konponbide bat ematea aztertu du udalak. Auzokideekin eta txosnetako kideekin batzarrak egin ditu azken hiletan. Azkeneko erabakia dena, hasieran ere proposatu zuen gobernuak, "neurri horregaz bizikidetza lortu ahal dela" uste izanda. Aurtengo jaietarako proba horregaz, zarata gutxituko dela eta ordutegia murriztuko dela azaldu du udalak. Baina auzokide batzuk ez dira gustura azaldu, eta txosnak bezala, barrakak ere lekuz aldatzea eskatu dute.
Hasierako batzar horien ostean, udaletik adierazi zuten gaia aztertuko zutela, baina zail ikusten zuten barrakak beste nonbait ipintzea. "Erdigunean dagoen leku falta zein kokaleku berriak egokitzeko gastu ekonomikoa" traba zirela esan zuten, eta kanpora ateratzeak jai giroan eragingo zuela ere bai.
Batzarren ondoren, jarrerak ez dira aldatu, eta txosnak lekuz aldatuko diren arren, barrakak aparkalekuan mantenduko dira, etxeetatik urrunduta. Auzokideetako baten ustez, "partxe bat" da erabaki hori. Albisteaz komunikabideen bidez enteratu izana ere ez du begi onez ikusi.