Ferixa Nausikoetarako aste beteren faltan, San Agustin auzoko jaiak prest dauzkate Olazar auzo elkarteko kideek. Eguenean 19:00etan jasoko dute txopoa, eta gero kantu afarian batuko dira. Barikuan egun osoko jaia izango dute: Eguerdiko 12:00etan meza eta argazkien erakusketa izango dituzte. Ostean, Besaide dantza taldeak emanaldia eskainiko du eta igel txapelketa izango dute. 14:30ean auzo bazkarian elkartuko dira.
Arratsaldean ere giroa egongo da Etxebarriako San Agustinen. 17:30ean umeentzako jolasak eta eskulanak izango dituzte, eta 19:00etan Zeren Zain? pailazo taldearen emanaldia. Gauerako kontzertua prestatu dute: Itziarren Semeak talde bilbotarrak ska, reggae eta punk doinuak ekarriko ditu San Agustinera.