Txapelketan, 20 urtera arteko trikitilari gazteek parte hartzen dute. Iazko lehenengo edizioa Eneritz Aulesti panderojoleak eta Julen Alonso trikitilari zarauztarrak irabazi zuten, eta Alonso aurten ere egongo da, baina, ekitaldi honetan, Alaitz Escudero panderojoleagaz.
“Arrakasta handia da bederatzi bikotek izena ematea”, azpimarratu du Juan Luis Elorza txapelketaren antolatzaileak. “Baina kezkatuta gaude, bestalde, parte-hartzaile guztiak gipuzkoarrak direlako, ez dugulako lortu Bizkaiko trikitilariak jotzera animatzerik: eskolak eta trikitilari gazteak Bizkaian ere badauden arren, ez dugu txapelketara erakartzea lortzen”.
Hainbat sari egongo dira jokoan, Elorrion, zapatuan: txapela eta 250 euro jasoko ditu irabazleak, 200 euro bigarrenak eta 150 euro hirugarrenak. Laugarren, bosgarren eta seigarren sailkatuek, bestalde, 80 euro jasoko dituzte bakoitzak.
“Ikaragarria” izan zen, Elorzaren berbetan, iazko lehenengo edizioari jendeak egin zion harrera: 500dik gora entzule inguruk jarraitu zuen saioa.