Euskal musikagintzako bere kanta kuttunen bertsioak eskaini zizkien zaleei Ruper Ordorikak iaz kaleratu zuen Azukre koxkorrak diskoan. Bestelakoa da azaro amaieran kaleratu duen diskoaren sorburua: musikariak adierazi duenez, “esateko behar” batetik sorturikoak dira Lurrean etzanda diskokoak. Dionisio Cañas idazlearen Zerutik gertu ez da ondo egoten kantaren euskarazko egokitzapena kenduta, disko berriko kanta guztiak Ordorikak idatzitakoak dira. Diskoaren aurkezpen orrian azaltzen denez, “oroimenaren garrantzia, maitasunaren beroa eta bizitzaren edertasuna” azpimarratu gura ditu Ordorikak kantuotan.
Leo Abrahams, Simon Edwards eta Kenny Wollesen musikari entzutetsuek lagunduta, iraileko lehenengo asteburuan grabatu zuen Lurrean etzanda.