Aldaketak eragin zuzena edukiko du beharginengan, onerako eta txarrerako. Lana zenbat eta automatizatuago egon, gero eta eskulan gutxiago beharko da. Baina ez dago argi zelan gauzatuko den hori. Eitb.eus eta Naiz.eusek jaso dutenez, Alberto Madariaga Eroskiko operazio zuzendariak esan zuen aldi baterako langile gehienen kontratuak ez dituztela luzatuko automatizazio prozesua amaitzean –2015-2016–. 400 beharginetatik 80 bat dira gaur egun aldi baterakoak, enpresako bazkide ez direnak. ANBOTOk galdetzean, ostera, Eroskiko prentsa zerbitzuak bestelako datuak eman ditu. Bederatzi lagun bakarrik leudeke lana galtzeko egoeran: automatizaziorako hartutakoak eta bajak kubritzen daudenak.
Alde ona lan fisikoa murriztu egingo dela da –bakoitzak 8.000 kiloko karga zeukan egunero–. Horregatik, baldintzak hobetuko direla esan dute Eroskikoek.