Ez dute edozelan garatuko; pedagogiaren zerbitzura antolatuko dutela esan dute, “pedagogia aktiboa” garatzeko. Izan ere, euren proiektua, umeari protagonismoa emanda garatzen dute batez ere. Beraz, euren premiei erantzuteko pentsatutako eraikina izango da.
Txintxirrikoek azaldu dute azken urteetan etengabea izan dela ikastetxearen hazkundea, eta espazio berrien hausnarketari aspaldi ekin ziotela. “Etorkizuneko proiektuaren lehenengo fasea baino ez bada ere, ikastolarentzat urrats erraldoia da”.
Eraikina bioeraikuntzaren arabera altxatuko dute. Filosofia horren barnean, adibidez, lurpeko perturbaziorik ez egotea eta material naturalak erabiltzea daude. Modu horretan, haurrentzako “ingurune goxo eta osasungarria” sortu gura dute.