Otsailaren 6ko gauean jazo zen lapurreta. Erremintak, aparailu elektronikoak, liburutegiko materiala eta edariak eraman zituzten lapurrek. Baina, aurreko asteburuan kontzertuak egon zirenez, musika materialaren bila joan zirela uste dute gaztetxekoek; material hori batuta zegoen ordea. Ez da Tabirako gazte espaziora lapurretan sartu diren lehen aldia.
Lapurretari garrantzia eman diote, eta era kolektiboan ulertu dute gainera, "Durangoko gazteriari eginiko lapurreta" dela sentitzen dute. "Jende askori egindako lapurreta izan da joan zen astekoa: urte eta erdi honetan fabrika zaharra biziberritzeko lana egin dutenei, astero asanbladan batzen direnei, oholtza gainera igo direnei eta entzutera etorritakoei...".
Bazkaritik kontzertuetara
Martxoaren 4an bazkari herrikoi bat prestatuko dute, eta tiketak Mesoi Berrian, Intxaurren eta Tabira Etxen ipiniko dituzte saltzen. Arratsalderako bingoa eta karta txapelketak iragarri dituzte, eta 20:30etik aurrera Cecilia Payne eta The Godoys Wonderers taldeen kontzertua.