Asteartean kazetariaren aurkezpen ofiziala egingo dute EH Bilduko zerrendagai moduan Donostian. Agerraldi horren aurretik, Iriartek bere Twitter kontuan erronka “ilusioz” hartzen duela aurreratu du: “Erronkaren atarian mila esker bihotzez lagun, lankide, azpimarratzaile izan zaretenoi. Hunkituta eta ilusioz gainezka. Besarkada bana”.
Iriarteren ibilbidea
Maddalen Iriarte Okiñena (Donostia, 1963) Donostiako Herri Irratian kazetari moduan hasi zen. Hala ere, telebista eman ditu urterik gehien. Prentsa idatzian zutabegintzan aritu da, Euskaldunon Egunkarian eta ondoren Berrian, Garan, Noticias de Gipuzkoan eta Deian.
ETBn hiru hamarkadatan hainbat saio gidatu ditu, besteak beste, Ados, Gau:ON eta Azpimarra. Emakunde saria jaso zuen, kazetaritzaren bidez berdintasunaren alde egindako lanarengatik eta Argia Sariek bi alditan saritu dute kazetari donostiarra.