Lanbidek 162.000 euro eman zizkion udalari, Eusko Jaurlaritzak sustatutako Enplegu Plana finantzatzeko. Durangoko administrazioak hamabi behargin hartu zituen sei hilean brigada lanak egiteko, baina kontratazioa Sartu-Zabaltzenen -gizarteratzea sustatzen duen erakundea- bidez egin zuen. ELAren ustez, erakunde hori ez da aldi baterako lan enpresa bat, eta udalak ezin du formula hori erabili.
Gainera, pertsona horiei ez zieten udaleko lan hitzarmena ezarri, baizik eta sektorekoa. Horrela, brigadako langileek baino baldintza eta soldata txarragoak eduki zituzten. Bataz-beste, bakoitzak 3.000 euro gutxiago jaso zituen, ELAk kritikatu zuenez.
Brigadan une horretan zazpi behargin bajan zeudela ohartarazi zuen sindikatuak; langileak beharrezko ziren, beraz. Ondorioz, udalaren jardueran dirua aurrezteko asmoa ikusi zuten ELAk lehenik, eta EH Bilduk ondoren. Enplegu Plana PSE-EE eta EAJko udal taldeek babestu zuten.