Kattalin Arizmendiarretak Ondarroako berbakerara ekarritako testuak “umorea, kritika eta drama” biltzen dituela azaldu du Ana Elordi antzezlanaren zuzendariak. Taldekidearen berbetan, “krisialdian dauden emakumeak dira protagonistak: egoera ekonomikoak, arrazoi existentzialek eta laneko kontuek eragindako krisialdia bizi duten emakumeak”.
Hain zuzen, emakumezkoak dira taldeko antzezleak: 20 eta 60 urte arteko ondarroarrak. “Horregatik, emakumeentzako testuen bila ibiltzen gara, eta azken urteotan testu garaikideak aukeratu izan ditugu gehienbat. Emakumezkoek sortutako lanak, sarritan”, azaldu du Ana Elordi zuzendariak. Ildo horretakoak dira Obarixo biaz lanaren aurretik prestatu dituzten Gizonak edo Hauxe da paraderu antzezlanak ere.
Ana Elordi aktoreak zuzentzen du 2007. urtetik Traman & Brix taldea, eta berak zuzenduriko antzerki tailer batean elkarturiko partaideek osatzen dute taldea.