Pilar Ríos bozeramaile sozialistak prentsa ohar bidez kontatu duenez, irailean lizitatu zuen biribilgunearen obra Aldundiak, "presaka eta udala informatu barik". Egitasmoari begira proposamen batzuk egin zituztela, eta teknikariek ondo ikusi zituztela esan du Ríosek. Ondorioz, ez du ulertzen zelan proiektuak berdin aurrera egin duen. Zinegotziaren arabera, gobernu taldeari sarritan eskatu dio Aldundiagaz batzartzeko, baina ez ei diote kasurik egin.
Gauzak horrela, biribilgunea egitean, Gasteiz Bidea hartu gura duten auto gidariek Intxaurrondoko biribilgunera arte joan beharko dute lehenengo, eta handik buelta eman Gasteiz Bideko sarrerara arte. Haserre agertu da Ríos: "Duela hogei urte txarto diseinatu eta lizitatu zuten, eta orain, berriro berdina egitera doazela dirudi". Gogoratu du azken bi hamarkadetan ia 100 istripu gertatu direla inguru horretan. "Akats guzti horiek herritarrok ordaintzen ditugu azkenean", esan du Ríosek.
