Topaguneak bidalitako prentsa oharrean dioenez, “hizkuntza komunitatearen garapenerako tresna ezinbestekoa da kulturgintza”. Horregatik, euskaltzaleen mugimenduak hasieratik lehentasun gisa hartu duela azaldu du. Azken hiru hamarkadetan ekitaldi ugari antolatu izan direla adierazi du, baina denbora horretan hainbat baldintza aldatu direla ere bai. Horregatik, hausnarketa berritzeko beharra ikusten dute Topagunekoek.
Hamar berbaldi antolatu dituzte, eta Igor Elortza bertsolariak, Lorea Agirre Jakin aldizkariko zuzendariak eta Hekimen elkarteko Alberto Barandiaranek parte hartuko dute, besteak beste.