Antolatzaileen arabera, Frantzian betetako zigorra berriro ere betearazi gura diete Espainian 56 preso hauei. Espetxe politika "kriminala" dela diote: "Zigorrak luzatzea biziarteko zigorra ezarriz, sakabanaketa, isolamendua, larriki gaixo diren pertsonak preso mantentzea eta jipoitzea... edozein neurri du zilegi PPk". Euskal Preso Politikoen Kolektibotik kanpoko beste preso batzuei duela aste gutxi ezarritako kaleratzea 56 horiei aplikatu ala ez erabakiko dute epaileek.
"Espetxe politika da PPren tresna nagusia Euskal Herriak bakearen bidean aurrera egin ez dezan", diote Ezker Abertzalekoek. Horregatik, presoen eskubideen aldeko borroka indartzeko deia egin dute, "bake agertoki bat ezingo delako finkatu preso bakar bat espetxean dagoen bitartean".