Eliza horretan aurkeztu ditu Xabier Arana Arandoño elkartearen ordezkariak, gaur, 2014ko organo kontzertuen azken bi emanaldiak. Barikuko Echechipiaren emanaldiaren ostean, François Espinasse frantsesagaz izango da hitzordua: abenduaren 19an ariko da izen handiko organista hori, Durangoko Andra Mariaren basilikan.
Arandoño elkarteak gonbidatuta hainbat aldiz jo izan du Jose Luis Echechipiak Durangon, baina Aranak azpimarratu duenez, kontzertu-solasaldi formatu honetan, "nasaiago" jardungo da, bariku honetan. Entzuleek musikariei galderak egiteko aukera ere eskainiko dute, bestalde. Errepertorio bariatua eskainiko du Echechipiak, barikuan, Durangon.
Organo kontzertuen ziklo honetan ohikoa den bezala, elizako altarean ipiniko duten pantailatik emango dituzte organistaren irudiak, jotzen dabilen bitartean.
François Espinasse, abenduan
Hamasei urte daramatza Arandoño elkartekoak organu kontzertuen ziklo hau antolatzen, eta maila altuko organistak gonbidatu izan dituzte antolatu dituzten 50 emanaldietara. Ildo horretan, abenduaren 19ko organistaren emanaldia ere azpimarratu du Xabier Aranak, gaurko aurkezpenean. Parisko Saint Séverin elizako Versallesko errege-kaperako organista baita, urte amaieran Durangon ariko den François Espinasse.