Tabirako gaztetxea

Correosen eraikin zaharra gazteentzako espazio izatea gura dute

Anboto 2014ko urr. 24a, 09:40

Hainbat gaztek 'Baguez gure espazio bile' dinamika aurkeztu dute udaletxe plazan. Adierazi dute gazteen premiak asetzeko espazio bat behar duela Durangok, eta alkateari eskaera zuzena egin diote. Udaletxe parean dagoen Correosen eraikin zaharra gura dute gazteentzako espazio lez.

Gazteek azaldu dute asanbladetan batu izan direla, eta ondorio batetara heldu direla: espazio bat behar dute harremantzeko, aisialdi kulturalerako, proiektuak garatzeko... Sentsibilitate eta iritzi ugaritako gazte taldea dela esan dute.

Premiak identifikatuta, ideiari forma ematen hasi dira. Auzolanean eta era kolektiboan sortu gura dute espazio berria, eta "kontrolatu edo mugatuko duen instituziorik barik". Erabilera anitzeko gelak jasoko dituen gune bat gura dute. Gainera, aukera berdintasunean eta euskararen aldeko "konpromiso argiagaz" eraiki nahi dute.

Gazteen arabera, hainbat leku publiko aztertzen ibili dira, eta Correos iruditu zaie egokiena. "Tamaina egokia, kokaleku zentrikoa, jabetza publikokoa eta urtetan erabilera aktiborik ez izatea" dira aukera hori egitera eroan dituzten ezaugarriak. Eskaera egin diote Aitziber irigoras alkateari, eta hemendik eta abendu hasierara bitartean batzartzeko deia egin diote, "komunikazio zuzenagoa mantentzeko".

ANBOTOKIDE izatea gure komunitatearen parte izatea da, euskararen erabilera sustatzea eta herrigintzaren aktibazioan pausoak ematea.


EGIN ZAITEZ KIDE!