Pinondoko kokalekuagaz pozik agertu dira txosnaguneko kideak. Euren berbetan, “Durangon txosnak egokitzeko lekurik aproposena” da.
Jaietako ekintzarik arrakastatsuenak erreka jaitsiera eta tortilla txapelketa izaten dira. Aurten, nobedadeen artean, urriaren 12an abentura kirolerako gunea ipiniko dute gazteentzat, goizean eta arratsaldean. Bigarren zapatuan, ohi denez, Mozorro Eguna izango da, eta, aurten, mozorrotzeko gaia udazkeneko joko olinpikoak izango da.
Kontzertuak
Jaien lehenengo gauean hiru kontzertuko kartela egongo da, Dinero, Minor Empires eta La M.O.DA taldeekin. Zapatuan, berriz, Pixontxis, Iheskide, eta Niña Coyote eta Chico Tornado taldeek joko dute. Bigarren asteburuko barikua ere kontzertu gau indartsua izango da: Han, Glaukoma eta Kashbad taldeek bisitatuko dute Pinondoko oholtza. Zapatuan erromeria doinuak nagusituko dira Euskabaretegaz eta Luhartzegaz.
Urriaren 11n, Gazte Eguna
Sanfaustoetan, udaletxeko eta txosnaguneko txupinazoez gainera, hirugarren txupinazo bat ere egongo da, Gazte Egunekoa. Urriaren 11n ospatuko dute Durangoko gazteek egun hori. 12:30ean Intxaurren egingo dute txupinazoa, eta goizaldera arteko jaia izango dute gero.
Txupinazoaren ostean, poteoan irtengo dira gazteak, eta 14:30 aldera txosnetan batuko dira, bazkarirako. Bazkariko txartelak Arkarazo, Mesoi Barria eta Intxaurre tabernetan daude salgai, hamar euroan. Bazkalostean, tribialean jokatuko dute.
Denen artean mahaiak batu eta gero, gazte olinpiaden txanda izango da, 17:30etik 19:30 aldera. Iluntzean elektrotxarangak girotuko du jaia, eta, 01:00ean, Gazte Gaba hasiko dute txosnagunean.