Anboto taldeko presidentea da Karreto, eta, legeztatuta egoteaz gainera, jarduera publikoa dutela dio. Amaierara arte joko dute epaiketetan: “Autokontsumorako eskubidea dugula uste dugu, eta epai guztiek babesten gaituzte”. Autokontsumoa legala dela adierazi du, eta landaketan eta kontsumo partekatuan sortzen ei dira nahasmenak.
Durangon lau elkarte daude
120 bazkide inguru dauzka Anboto taldeak, eta arau deontologikoa edo etikoa guztiek daukate onartuta. Epai judizialei jarraituz, kopuru zehatz bat partekatzen dute –hiru gramo eguneko–, eta beste inori ez banatzeko konpromisoa dute hartuta. Gainera, ez da Durangoko talde bakarra; lau daude, eta, Karretoren ustez, ehunka kontsumitzaile daude. Beraz, autokontsumoa normala dela dio. Baina normalizazioa lortzeko, erregulazio baten beharra ikusten du, “atxiloketek egoera zailtzen dutelako”. “Ez dugu zertan horrelako egoerarik jasan”.
Eusko Legebiltzarrean martxan dago lanketa bat, eta, antza denez, ia aditu guztiek egin dute erregulazioaren alde. Baina, ez dago erabakirik hartuta, eta kontsumitzaileek egoera zalantzati horretan jarraitzen dute.