Josu Aranburuk zabalduko du gaua, bere kanta zerrendagaz giroa berotuta. Ondoren ariko da Ruben Kostas, bere doinu alai eta dantzagarriagoekin; eta Ibailok itxiko du gaua, musika ilun eta undergroundagoaz. Lagun gehiago ere gonbidatu dituzte Friends ekimenaren lehenengo saiora: aurkezpena egiten eta kantuan ariko dira, besteak beste.
Kostasen berbetan, azken urteotan Plateruenean antolatutako Gau Elektronikoak baino “proiektu umilagoa, apalagoa” da Friends; helburu nagusitzat lagunekin musika gozatzea duena: “esentziara” bueltatzea.
Musika elektronikoaren barruko joera “serioagoetara eta flow geldoagoa duenetara” joko dutela azaldu du Kostasek, “publiko helduago baten bila. Gau Elektronikoan nazioartean ezagunak diren artistak ekarri bazituzten, gertukoagoekin jardungo dira orain, eta maiztasun gutxiagogaz antolatuko dituzte saioak: “Lehengo dinamikagaz barik, lasaitasun handiagoagaz ariko gara, urte osoan bi jaialdi antolatuta, esaterako”.