Ezaugarri teknikoak
Bizkaiko Foru Aldundiak Gerediaga-Elorrio autobidearen ezaugarri teknikoak azaldu ditu. Autobideak 6,4 km ditu; galtzada bi ditu. 1.965 metro luze den tunel bat (Gazteluakoa) eta tunel faltsu 2 dauzka. 2,4 milioi m³ hondeatu dira eta 1,2 milioi m³ lubeta bihurtu dira. Tunelen ahoei lotuta, 1,8 milioi m³, berriz, soberakinen hiru biltegietara eraman dira.
EH Bilduren kritika
EH Bilduk prentsa oharrean dioenez, "Imanol Pradales diputatuak esan du Gerediaga-Elorrio autobidea doakoa izatea eskualdeko lehiakortasunerako ona dela. Hori gezurra da: autobide hori inolaz ere ez baita doakoa". Oharrean gogoratzen dutenez, "errepide honen eraikuntzak %40ko gainkostua jasan du; honez gain, bizkaitarroi errepide honek 1.400 milioi eurotik gorako kostua suposatuko digu, hori baita datozen 27 urteetan itzalpeko ordainsaria sistemarekin ordainduko duguna; eta ez dezagun ahaztu aipatu errepidea AP8arekin zuzenki lotuta dagoela, eta bertan bai ordaindu beharko dutela, bai ala bai, autobide berri honen erabiltzaile guztiek".
EH Bilduk Gazteluako eta Atxondoko obrak kritikatu ditu. "Pradales jaunak errepide berri honen lanek eragindako kalteak ahaztu ditu, aipagarrienak Gazteluan eta Atxondon izandakoak. Horregatik bertako biztanleen ahotsa entzun izan dadila gura dugu, aipatutako kalteak ez baitira soilik gainkostu ekonomikoak, baita sozialak ere. Beharrezko denean, gure herrietako biztanleak errepidea erabiltzera animatzen ditugu, hori ez dugu ezkutatzen. Salatu nahi duguna zera da: Pradales jaunak eta Bizkaiko Foru Aldundiak esandakoa ez dela egia osoa, soilik interesatzen zaiena baizik".