Aldundiaren planen artean, "Bizkaiko arrakastatsuena" izan da hemengoa, Alfonso García enplegu zuzendariaren esanetan. Izan ere, partaiden artean enpresa sortu dutenen tasa %72koa izan da, herrialdekoa %58koa denean. Aldundiagaz batera Durangoko Udala ibili da koordinazioan, eta Pilar Ríos alkateordeak esan du "merkatutik urrunen" daudenei lana topatzen laguntzea izan dela helburua.
21 enpresetatik, 7 sortu dira Durangon. Berrizen, Elorrion, Mallabian eta Otxandion bana eratu dute, eta Ermuan 10. Deneriko arloetakoak dira egitasmoak: diseinu grafikoa, psikologia, alokairuen gestioa... Otxandion gozoki denda bat zabaltzea da asmoa, adibidez.
Alderdien polemika
Otsailean aurkeztu zuten programa, eta EH Bildu eta Ahal Dugu kritiko agertu ziren. Programa aldundiko DEMA agentziak garatu du, eta Behargintza "edukiz husteko" saiakera ikusi zuten horren atzean.