Gobernatzea lortuz gero, Aitor Lopezek adierazi du gestio “dinamikoa” egin gura dutela. “Ez dugu gura Amankomunazgoa zerbitzuen gestiorako bakarrik izatea”. Eskualdeko beste sektoreekin lankidetzan jardun gura dute, eta herritarrekin prozesu parte-hartzaileak hastea ere bai. Gainera, “Tokiko Garapeneko arlo indartsu bat” sortzea da EH Bilduren asmoa.
Udaletako ordezkari banaketaren arabera, EH Bilduk hamahiru kide izango ditu Amankomunazgoan. EAJ dauka atzetik, hamaikagaz. Bestalde, Abadiñoko Independenteek bi lortu dituzte, eta Durangon Podemos-Ahal Duguk babestutako Herriaren Eskubideak bat. Aurreko legealdian independenteek jeltzaleei eman zizkieten aulkiak; orain, berdina gertatu arren, badirudi Herriaren Eskubideak edukiko duela Amankomunazgoko giltza.