Lasterketa maila guztietan lehiatuko dira, gizon zein emakumeetan. Aurreko aldietan legez, 200 parte-hartzailetik gora batzea espero dute. Kadete mailako neska-mutikoak izango dira irteten aurrenekoak, 10:00etan. Ondoren, 11:00etan, junior mailakoen txanda izango da, eta emakumeen elite eta 23 urtez azpikoena ere bai. 12:00etan Master 30, 40, 50 eta 60 mailakoak irtengo dira belodromotik; azkenik, 13:00etan, gizonen elite eta 23 urtez azpikoen txanda izango da.
Faboritoak bereiztea ez da batere erraza. Irteera puntuan nortzuk egongo diren jakitea ere gaitza da; batetik, izen-ematea egunean bertan egin daitekeelako –09:00etatik aurrera–, eta, bestetik, asteburuan, Nabian (Asturias) Espainiako Koparako puntuagarria den proba bat jokatuko delako, eta baliteke faboritoak hara joatea.
Iaz euria egin zuen, eta lokatzak lasterketa gogortu zuen. Aurten, iragarpenek diotenez, ez du euririk egingo.